Lettura e commento di Mario Iazzolino
S’abbicina lu viernu, jennariellu
ccu lu jancu mantiellu s’abbicina!
Foculariellu mio, foculariellu
cumu si biellu mmienzu alla cucina!
Ligna de cerza e pane de carusa
viata chilla casa duve s’usa!
Na pignata chi vulla a nu spicune,
nnu fuocu sc-cattiente e joculanu,
e si cc’è, benerica, nu jascune,
e ti cce cali ccu na bella manu,
e lu vasi allu spissu, gioia mia,
cchi fa la tramuntana? E’ ciotarìa!
Jennaru! Mina vientu e tu te ngatti
ccu sia cuverte e si’ dintra nu niru!
E’ na gioia fatata, e a cunti fatti,
te vuoti, te rivuoti e fai l’agliru!
Jennaru, biellu, giubilu, fatuzzu,
puorti, puorti ccu tie lu purcelluzzu.
E basta chissu sulu ppe t’amare,
e t’adurare cumu nu pilieri!
Dici : ammazzamu!…E te sienti mpananre
l’uocchi de cuntentizza, e li pensieri
trivulusi spariscianu a ruvina
cumu le neglie si lu vientu mina!
Puorcu!…Gioia, riccchizza d’ogne casa,
grannizza vera, pumpusìa frunuta!…
Ccu lu filiettu mpacchi la prim’asa
la fragagliella, mo cce vò, t’aiuta!…
E all’urtimu, quatrà, cce la quadara!…
Cchi cc’è allu munnu ca sa cosa appara?!
Chine frittula à dittu, à dittu quantu
de cchiù biellu cce sta sutta lu sule !
Nun c’è bisuognu, no, ca vi l’avantu;
l’avantu si lu puortû sule, sule!
Cchi bellizze chi sû! Cce chiecchiarii?!
Duve te cali cali te ricrii!
‘A frittulilla è grassa? E cce nsapuri!
Ccu lu curijellu ti cce fai la vucca!
Ccu le palette e ccu li vattituri,
chiuri le chiavi e ncasi la pirucca!
Pue la nteccuzza ccu la nsalatella!…
Cchi barsamu chi sû, chi cosa bella!
E dire ca cce sû ssi munni munni
certi scangierri, o Dio, nsignurinati,
surchiati, mprilliccati, filiunni,
chi stuorcu l’occhi e fanû li stuffati:
«Cibo pacchiano, o! Dio, per carità,
come si mangia, via , come si fa!»
Ah! Chi ve vuolû fare alli jimbielli,
malanova v’accucchi, mienzi spiti!
Cche vi pranzate voi? Latte d’agielli?!
E già, ppe chissu siti culuriti,
fore maluocchiu, cumu la jinostra!…
Cibo pacchiano? Ih! malanova vostra…!
Ma lassamuli stare a chissi tali,
ch’è lussu si sû buoni ppe l’acitu!
M’assimiglianu, vì sû tali e quali
nu cacumbaru musciu e ngiallinitu,
chi lu jietti a na rasa, e si lu pruovi,
cca ti se conza, e sempre cca lu truovi!
Nun saû chid’è lu puorcu! E ‘ntra la casa
quannu cced’illu cc’è na zumpunia!
Io mo cchi sacciu, sc-camanu a nna rasa
e te sienti na gioia, n’allegria!
Lu pecuraru ch’è cerviellu sanu
fa : «Cunnituru mio ppe n’annu sanu»!
E ccu lu dittu de lu pecuraru
iu chiudu ssu taluornu e fazzu puntu !…
Viatu chi po’ dire mparu mparu
e lu po’ dire a buonu fattu cuntu:
«Tri nn’àiu, vracchi, jofali, curalli
vidi tri puorci e dici : tri cavalli…»
Io, povar’omu, ancora mignu vientu…
lu purcelluzzu mio ciglia a la rina!
E ‘ntra lu core nu scunsulamientu
me sientu, e sbattu stomacu e stentina!
A vue lu cuntu! E’ vuce perrupata….
Ma nun fa nente, cantu ‘a serenata.
Commento di Mario Iazzolino
Fra i bei ricordi di Ciardullo, s’inserisce questa che appare come la festa dei pochi sapori tradizionali del popolo che nel mese di gennaio ricorreva in occasione dell’uccisione del maiale. Era una consuetudine necessaria per avere una provvista per tutto l’anno, quando la società contadina non aveva molte risorse per comprare giornalmente il cibo necessario.
Egli ne fa una poesia giuliva e musicale, artisticamente perfetta, in cui lo spirito, la tradizione, il costume del popolo è ben rappresentato. È soltanto un’immedesimazione intima e gustosa di uno dei pochi momenti di gioia e di godimento. Egli dimostra, infatti, di aver gustato i vari sapori compresi nelle frittole (‘A frittulilla è grassa? E cce nsapuri!… Cchi barsamu chi sû, cchi cosa bella!), e lamenta che il suo maiale è presente soltanto al mercato (Lu purcelluzzu mio ciglia a la rina!).